In hierdie wêreld het min ‘n brandende begeerte om God werklik te ken. Kennis oor ander dinge blyk meer relevant te wees. In die sielkunde-wêreld word daar klem gelê op om jouself te leer ken.
Clyde Pilkington het hierdie wyse waarneming gemaak, “Die roeping van die gelowige se lewe is nie die menslike, selfgesentreerde sielkunde van ‘ken jouself” nie, maar die goddelike, Christus-gesentreerde spiritualiteit van ‘ken Hom’.”* Selfs in sommige kringe in die Christendom word selfontledings-programme bevorder om “jou temperament en persoonlikheidstipe te ontdek”. Alhoewel dit op sigself nie noodwendig verkeerd is nie, is daar dikwels ‘n “mis van die teiken” (dit is wat sonde is), deurdat om God te leer ken, oor die hoof gesien word.
Alhoewel ons niks op ons eie kan doen om geestelik te groei nie, sê die Skrif vir ons dat deur ons oë op die verheerlikte Christus te vestig (nie die tradisionele prentjie van Jesus met lang vloeiende hare nie), word ons na Sy beeld getransformeer.
En ons almal, terwyl ons met ontsluierende gesig die heerlikheid van die Here aanskou soos in ‘n spieël, word na dieselfde beeld verander van heerlikheid tot heerlikheid, soos van die Here, die Gees (2 Kor 3:18 – 2020 vertaling deurgaans, behalwe waar anders aangedui).
Ons weet dat Christus die presiese uitbeelding van God is (Heb 1:3). Wanneer jy Christus leer ken, leer jy God ken.
Aspekte van God wat oor die algemeen onderwaardeer word, is Sy diepte van liefde, Sy wysheid, intellek en kennis en soewereine gesag. Wat die wêreld nie besef nie, is dat om God te ken een van die kosbaarste besittings is wat ‘n mens kan hê.
God se perspektief is totaal anders as dié van die mens. Wat die mens as suksesvol en as prestasie beskou, is irrelevant in God se oë. Rykdom, mag, gewildheid en wêreldse wysheid tel niks vir God nie. Wat werklik tel, is om te verstaan wie God is en Hom werklik te ken.
“Want my gedagtes is nie julle gedagtes nie, en julle weë is nie My weë nie,” spreek die HERE. “Want soos die hemel hoër is as die aarde, so is my weë hoër as julle weë en my gedagtes as julle gedagtes.” (Jes 55:8-9 – OAV)
Slegs hierop moet die een wat wil roem, hom beroem:, dat hy insig het en My ken, naamlik dat Ek die HERE is, wat troue liefde, reg en geregtigheid handhaaf op aarde, want daarin vind Ek vreugde.” Dit is die uitspraak van die HERE (Jer 9:24).
Om God te leer ken kom nie vanself nie en niemand kan daardie kennis deur sy of haar eie toedoen bereik nie.
Die een wat die Vader werklik ken, is Jesus, Sy Seun. Dit is die Seun wat die Vader openbaar en Hy doen dit volgens Sy wil en begeerte, wat in lyn sal wees met die Vader se wil en begeerte. Sonder daardie openbaring kan ‘n mens God nie leer ken nie. Dit is hoekom Jesus gesê het:
Alles is deur my Vader aan My toevertrou. En niemand ken die Seun nie, behalwe die Vader, en niemand ken die Vader nie, behalwe die Seun en elkeen aan wie die Seun Hom bekend wil maak (Mat 11:27)
Soos ons groei in ons kennis van Hom, sal ons waardering en liefde vir Hom toeneem.
Vir die apostel Paulus was geen kennis belangriker as om Christus te ken nie..
Inderdaad reken ek alles as verlies, ter wille van die uitnemendheid daarvan om Christus Jesus , my Here, te ken. Ter wille van Hom, het alles vir my ‘n verlies geword, en beskou ek dit as vullis, sodat ek Christus as wins kan verkry… (Fil 3:8))
Paulus se ernstige gebed vir die Kerk in Efese was
…..dat die God van ons Here Jesus Christus, die Vader van die heerlikheid, vir julle dit sal gee: geestelike wysheid en openbaring, wat in die kennis van Hom bestaan…(Ef 1:17)
Vir ons, wat deel is van die Liggaam van Christus, is dit God self wat ons harte en oë oopmaak om wysheid en openbaring te ontvang om kennis van Hom te ontvang. Dit is iets wat ons nie self kan genereer nie.
In eons [eeue] wat kom, sal daardie openbaring van wie en wat en hoe God is, aan meer en meer mense gegee word. Vir Israel is daar ‘n profesie dat daar ‘n tyd sal wees wanneer almal van hulle God sal ken.
… dit is die verbond wat Ek ná daardie dae met die huis van Israel sal sluit, is die uitspraak van die HERE: “Ek sal my wet in hulle binneste gee, en dit op hulle harte skryf. Ek sal vir hulle ‘n God wees, en hulle sal vir My ‘n volk wees. Hulle sal nie meer elkeen sy medemens of sy broer leer en sê: “Ken die HERE!” nie, want hulle almal sal My ken, van die kleinste tot die grootste onder hulle,” is die uitspraak van die HERE. “Want Ek sal hulle sondeskuld vergewe en aan hulle sonde sal Ek nie meer dink nie (Jer 31:33-34).
Deel van die nuwe verbond met Israel sal wees dat God die skille van hulle oë sal verwyder sodat hulle God sal leer ken vir wie Hy werklik is. Dit sal van toepassing wees op die hele Israel oor die hele spektrum, van die kleinste tot die grootste. Niemand sal God aan ‘n ander hoef te verduidelik nie, want hulle sal Hom almal ken. Dit illustreer die feit dat God is die Een wat besluit wanneer en aan wie Hy Homself sal openbaar.
Hierdie kennis van God sal mettertyd oor die hele aarde versprei.
Ja, die aarde sal gevul word met die kennis van die heerlikheid van die HERE soos water die see oordek (Hab 2:14).
Dit is waaroor die eoniese lewe gaan. Dit gaan daaroor om die enigste ware God en sy Seun, Jesus Christus, te leer ken. Dit sal die hooffokus wees. Die fokus van hierdie lewe, of dit nou die strewe na geld of rykdom of besittings is, of die stryd om ‘n bestaan te maak of om te presteer in enige menslike strewe, sal in toekomstige eeue irrelevant word.
En dit is die ewige [letterlike bronvertaling: aioniese] lewe: dat hulle U ken, die enigste ware God, en ook Hom wat U gestuur het – Jesus Christus.. (Joh 17:3)
Selfs hemelse wesens is nou en sal in toekomstige eeue leer oor die groot wysheid van God. Interessant genoeg is dit die Ekklesia (die Kerk wat die Liggaam van Christus is) wat hierin ‘n rol speel.
Gevolglik kan die ryklik geskakeerde wysheid van God nou deur die kerk aan die owerhede en die magte in die hemel [bronteks: hemelse sfere] bekend gemaak ooreenkomstig sy ewige voorneme, wat Hy gemaak het in Christus Jesus, ons Here. met die voorneme van die eeue wat Hy maak in Christus Jesus, onse Here. (Efes 3:10-11)
Daar sal altyd ruimte wees vir groei in die kennis van God en Christus. ’n Mens sal nooit die punt van volmaakte kennis bereik nie – selfs nie nadat jy duisende jare in die teenwoordigheid van Christus was nie. Namate ‘n mens kennis van God verwerf, sal die diepte van ‘n mens se waardering vir Hom soos ‘n ewig-klimmende grafiek wees. Die begeerte om Hom eer te gee sal nooit verdwyn nie. Dit sal eerder sterker word soos die tyd verbygaan.
Sorg dat julle aanhou groei in die genade en kennis van ons Here en Verlosser, Jesus Christus. Aan Hom behoort die heerlikheid, nou en ook tot op die dag van die ewigheid [eon] (letterlike vertaling) Amen (2 Pet 3:18).
***
*Daily Goodies July 11